Pas Bordit për Menaxhimin e Naftës, kryeministri Edi Rama njoftoi sot ngritjen e një bordi për përcaktimin e çmimeve të produkteve bazë ushqimore. Gjatë takimit me importuesit e mëdhenj të ushqimeve, Rama tha se bordi do të bëjë transparencën e ushqimeve, çmimet e të cilave janë rritur ndjeshëm ditët e fundit.
“Ajo që më ka shqetësuar nga raportimi i Ministrisë së Financave është se shumica ia hedh fajin pakicës dhe pakica ia hedh shumicës dhe për të mos pasur hedhje faji do futemi edhe ne në këtë mes dhe do krijojmë bord të përbashkët për çmimet e ushqimeve bazë të shportës. Ky bord i përbashkët do të përbëhet nga përfaqësues të qeverisë dhe përfaqësues tuajt. Dhe çmimet e ushqimeve bazë do të vendosen aty dhe askush nuk do të tolerohet të vendosë çmime të vendosura aty. Kush vepron ndryshe do t’i konfiskohet prodhimi”, tha Rama.
Kryeministri tha se importuesit e mëdhenj nuk mundet që të mbajnë të njëjtat nivele fitimi si para luftës duke iu thënë se nuk është momenti për të fituar.
Më herët, kryeministri Rama ngriti një bord për menaxhimin e naftës, ku ndonëse në bursa çmimi ka rënë në djeshëm, në vendin tonë po reflektohet shumë ngadalë, ku bordi njoftoi ditën e djeshme se nafta do të tregtohet në çdo pikë shitjeje me 203 lekë për litër.
