Kryetari i PD-së, Sali Berisha, hodhi akuza ndaj mazhorancës socialiste dhe kryeministrit Edi Rama për antishqiptarizëm dhe aleancë me Serbinë në këto momente, duke braktisur ëndrrën e shqiptarëve, që është integrimi në Bashkimin Evropian.
Ai theksoi se të gjitha këto lëvizje të fundit politike, largimi nga BE dhe afrimi me Beogradin për Ballkanin e Hapur, nëpërmjet letrës së përbashkët me presidentin Vuçiç, Rama i bën për të mbrojtur vetën dhe “Lubi Ballukun”.
Ai e cilësoi kryeministrin si argat i Serbisë që nuk tha asnjë fjalë për gjenocidin serb në Kosovë, por as për ngjarjet atje.
“Ky argat i shpifur, kur u vra heroi në Banjskë nga sulmet terroriste, kur e gjithë Europa e dënoi si akt terrorist, foli për një ngjarje tragjike me humbje jete. Edi Rama u kthye me letrën e hapur që i dërgon BE-së, me Vuçiçin, u kthye tek padroni i tij. T’u pyes ju o të dashur shqiptarë, po çfarë ngjashmërie kemi ne me Serbinë? Cilin shtet kemi sulmuar ne?
Ne që jemi në të gjitha luftërat në anën e aleatëve tanë. Si mund të rreshtohemi ne me Serbinë? Çfarë gjenocidi kemi kryer ne, kundër kujt? Pse ky faqezi do me çdo kusht të na lidhë me ta? Çfarë shqiptari është ky që këtu nuk voton gjenocidin e serbëve në Kosovës?”, u shpreh Berisha në fjalën e tij nga foltorja e Kuvendit.
Më tej ai iu kthye deklaratave të Vulin ndaj Kosovës për të vepruar si Izraeli me Iranin ndaj Prishtinës duke e sulmuar, dhe heshtjes së Tiranës.
“Dëgjoni, të dashur qytetarë, çfarë është ky moment. Lexoni pak çfarë thotë Vulin. Të sulmojmë Kosovën, të ndjekim Ajatollahët. U bën thirrje të sulmojnë Bondstillin. Po, po janë reale këtu. Dhe Vuçiçi dënon vrasjen e mizorit Khamenei. Kurse ky faqezi del me letër të hapur për BE-në së bashku me Vuçiçin”, vijoi ai.
Dhe në fund ai i bëri thirrje mazhorancës socialiste që të reagonte dhe të mos silleshin si antishqiptarë, për të mbrojtur Ramën dhe Ballukun.
Ai theksoi se me veprimet që po kryenin duke u afruar me Serbinë, “e kishin harram qumështin e nënës”.
“A e kuptoni apo jo? A jeni shqiptarë apo jo? A jeni shtetas të këtij vendi? E doni këtë vend apo e urreni njëlloj si ai? E gjitha kjo për të mbrojtur krimet e tij. Për të mbrojtur Lubinë e tij. Kjo që po ndodh në Shqipëri është akt i pashembullt. Letër e hapur që ne jemi me Serbinë, nuk do jemi me ju. Na jepni atë tregtinë e lirë dhe të tjerat i zgjidhim vetë. Se do krijojmë me Serbinë dhe Ballkanin e Hapur të ardhmen tonë. Nuk duam pasaportën tuaj, duam pasaportën serbe. A jeni shqiptarë ju apo çfarë jeni? Haram e keni çdo pikë të qumështit të nënës që keni pirë!”, përfundoi Berisha fjalën e tij.
