Kreu i Shoqatës për Mbrojtjen e Konsumatorit, Ervin Resuli ditën e sotme ka dhënë një intervistë për “Fax News” ku ka folur lidhur me gjendjen e prodhimit vendas dhe situatën ku ndodhen fermerët shqiptarë, të cilët pavarësisht premtimeve të bëra nga qeveria nuk kanë marrë ende asnjë mbështetje konkrete.
Resuli tha se pavarësisht se tashmë bujqësia dhe blegtoria ishin në kulmin e punës, asnjë masë lehtësues nuk ishte marrë ndaj fermerëve.
“Siç thatë edhe ju bujqësia edhe blegtoria tashmë gjenden në kulmin e punës së tyre. Sa i përket blegtorisë, kanë qenë mbjellja e jonxhave, e misrit jo vetëm për blegtorinë por edhe për të ushqyer popullatën. Po ta marrim në këtë aspekt, tashmë aktualisht, fermerët dhe blegtorët janë në fusha dhe të paktën tani skema e naftës duhet të kishit filluar shpërndarjen apo duhet të ishte drejt fundit të shpërndarjes që fermerët të cilët patën nevoja të larta për tokat e tyre ta përdornin. Naftën që do marrin pas dy apo tre muajsh, i bie ta konsumojnë për makinat e tyre private, pasi nuk kanë për çfarë ta përdorin tjetër duke qenë se u duhej brenda 31 dhjetorit.”
Sipas tij në fund do të vërehet se do të ketë më pak korrje, si rezultat i mungesës së mbështetjes së qeverisë ndaj fermerëve, të cilët u përballën me rritjen e inputeve bujqësore.
“Fermerët gjithmonë kanë qenë të gatshëm pavarësisht viteve të vështira që ka sjellë koha duke kultivuar tokat e tyre. Por ky vit siç e thatë ju për arsye të rritjes së kostove për lëndët e para, e ka vështirësuar akoma më shumë punën e fermerëve. Rajoni i ka mbështetur duke hequr TVSH-në për naftën apo inpute të ndryshme, e kundërta ka ndodhur në Shqipëri ku fermerët në kulmin e kësaj krize janë lënë vetëm. Interesi për të kultivuar drithëra ka qenë e lartë, por mundësia e fermerëve tanë ka qenë shumë e ulët. Nëse do marrim në konsideratë serat, për këtë vit janë 20% më pak të domateve krahasuar me vitin e kaluar.”
Së fundmi, Resuli e mbylli fjalën e tij duke thënë se me ardhjen e sezonit të korrjeve sipas tij do të shohin reduktime të shumta pasi lënda e parë ka qenë me çmim shumë të lartë.
“Kur të vijë sezoni i korrjeve ne do shohim reduktime të shumta. Kjo do thotë se do korrim më pak grurë dhe misër këtë vit për arsye se lëndët e para kanë qenë me çmime shumë të larta.”
