Afrimi i datave të afatit ku fermerët mund të aplikojnë për naftë pa akcizë ka krijuar dyndje në dyert e administratës për të hapur NIPT-in.
Mësohet se në Lushnje rreth 400 persona shkojnë çdo ditë për të plotësuar dokumentacionin edhe pse sistemi i Tatimeve pranon vetëm 70 aplikime në ditë.
Fermerët, të cilët u janë drejtuar zyrave të shtetit së fundmi thonë se për ditë të tëra nuk po arrijnë të kryejnë punë.
“20 ditë, kam ardhur 5 herë, mezi doli sot.””Akoma s’kam mbaruar, kam 2-3 javë që vi.””Më tha për aplikim për NIPT, u vonua 17 ditë.”, shprehen disa prej tyre.
E njëjta situatë paraqitej edhe në Korçë të mërkurën. Fermerë të shumtë nga të gjitha zonat drejtohen që të formalizojnë biznesin e tyre.
Të gjithë fermerët që duan të përfitojnë naftë pa akcizë sipas qeverisë duhet të jenë të pajisur me një NIPT, ndërsa mund të aplikojnë për skemën e kompensimit deri më datën 30 mars.
