Policia e Dimalit ka zbardhur një ngjarje të ndodhur më 29 qershor ku një 63-vjeçar mbeti i lënduar rëndë dhe më pas humbi jetën në spital.
Ngjarja fillimisht u referua si aksidentale, por pas hetimeve ka rezultuar se 63-vjeçari i cili po udhëtonte me një biçikletë, është përplasur nga një motomjet. Shoferi i motomjetit pas aksidentit ishte larguar nga vendi i ngjarjes.
“Më datë 29.06.2022, u gjet në rrugë, i rrëzuar nga biçikleta, shtetasi K. H. Në bazë të dyshimeve të krijuara se 63-vjeçari nuk ishte rrëzuar aksidentalisht nga biçikleta, siç u raportua fillimisht, por ishte goditur nga një mjet tjetër, gjithashtu bazuar dhe në informacionet e siguruara në rrugë operative, falë bashkëpunit me AMP, u referuan materialet në Prokurori, si dhe u bë regjistrimi i procedimit penal, për veprat penale “Drejtimi i mjetit në mënyrë të parregullt” dhe “Largimi nga vendi i aksidentit”, bën me dije policia.
Në përfundim të veprimeve hetimore është bërë e mundur zbardhja dhe dokumentimi i plotë i kësaj ngjarjeje, si dhe ndalimi i E. D., 27 vjeç, banues në fshatin Drenovic, Dimal, si autor të aksidentit.
