Këtë të shtunë, u zhvillua një protestë-marshim në Shkodër, e organizuar nga opozita si një kundërpërgjigje qytetare pas masakrës me tre viktima disa ditë më parë në kryeqendrën e veriut. Dhjetëra qytetarë u nisën nga bashkia e qytetit, duke marshuar në Pedonale në shenjë sensibilizimi. Marshimi vijoi rreth 1 orë teksa pjesëmarrësit u kthyen sërish para ambienteve të bashkisë.
“Qytetnimi asht ma i fortë se krimi. Po na vrasin, na duhet reagimi”, shkruhet në pankartën e madhe që protestuesit mbajnë në duar.
Qytetarët mbajtën edhe një minutë heshtje për viktimat e atentatit në Dobraç, ku mes tyre ishte dhe një qytetare e pafajshme, Flutura Basha.
I pranishëm në këtë marshim është edhe ish-kreu i kësaj bashkie, demokrati Bardh Spahia. Ai deklaroi për mediat se “të gjitha strukturat shtetërore duhet të vihen në lëvizje për të mos e lënë Shkodrën të bjerë në kthetrat e krimit.”
Sekretari i PD-së, Flamur Noka tha se Shkodra sot është djepi i krimit të organizuar dhe shkaktari i vetëm është Edi Rama dhe rilindja.
“Mesazhi është për qytetarët të ngrihen kundër narkoregjimit, kundër krimit me pushtet, kundër këtij regjimi që po përpiqet të rrënojë Shkodrën dhe gjithë Shqipërinë. Shqiptarët nuk mund të pranojnë një krim që është nën kthetrat e krimit”, shtoi Noka.
“Tashmë Rama është bërë një me krimin, me bandat e organizuara kriminale për të manipuluar zgjedhjet, ndaj ne do e vijojmë betejën tonë, dhe kjo është vetëm një pjesë pasi ne do të jemi në mbrojtje të qytetarëve gjithmonë”, u shpreh deputetja tjetër demokrate Lindita Metaliaj.
“Pa u larguar Edi Rama sigurisht nuk mund të ketë paqe dhe ne jemi të bindur që do vazhdojmë bashkëpunimin me qytetarët dhe kjo betejë arrihet vetëm përmes këtij bashkëpunimi”, tha Luçiano Boçi.
Nënkryetari i PD, Oert Bylykbashi u shpreh se është e papranueshme që Shkodra të jetë modeli i simbiozës krimit me politik.
Gjatë protestë kishte thirrje kundër qeverisë dhe kryeministrit Edi Rama. Pakënaqësi ndaj qeverisjes Rama dhe situatës së sigurisë në Shkodër, qytetarët i shprehën edhe në prononcimet për mediat.
“Shkodra ka qenë djepi i kulturës, qyteti i biçikletave, tani kanë frikë të dalin edhe me makina të blinduara”, tha një qytetar.
