Tre ditë më parë, Astrit Patozi deklaroi se kishte dorëzuar në gjykatë dokumentacionin me 4000 firma qytetarësh për krijimin e forcës më të re politike në vend, me emrin Bindja Demokratike.
Por, sipas asaj që ka zbuluar News 24, me dokumentacionin e dorëzuar në gjykatë disa nga firmëtarët janë fiktivë.
Dritan Agushi, Zyber Molla, Shyqyri Proshka, Mehmet Sheme dhe Mirjan Krasniqi janë qytetarët, të cilët ankohen se firmat e tyre në radhët e kësaj partie janë fiktive.
Dritan Agushi nga qyteti i Kavajës deklaroi se ishte vënë në dijeni nga familjarët që emri i tij ishte në listën e themeluesve. Ai thotë se ndodhet jashtë vendit dhe se firma e tij është falsifikuar, madje premton se do ta ndjekë ligjërisht çështjen.
Këta qytetarë shprehin gatishmërinë e tyre të vendosin para gjykatës specifikimet e shkrimit të tyre për të verifikuar shkencërisht se firmat për rregjistrimin e Bindjes Demokratike janë fallsifikuar.
