Ministri i Brendshëm Bledi Çuçi ka lajmëruar sot se data 25 maj është caktuar me vendim qeverie dite pushimi zyrtar, por kjo vetëm për të gjitha institucionet publike të qarkut të Tiranës.
Ky vendim vjen pas finales së Conference League e cila do të mbahet në stadiumin “Air Albania”, ku ndër të tjera, ministri tha se ata ditë do të bllokohet gjithashtu dhe qarkullimi i makinave në të gjithë Tiranën.
“Sot qeveria mori vendimin që datën 25 ta shpallë si ditë pushimi për të gjithë institucionet publike që janë pjesë e qarkut të Tiranës pra do jetë ditë pushimi për gjithë zyrtarët publikë të qarkut Tiranë.Kjo masë merret në vazhdim të masave, për eventet më të mëdha si ajo e finales së Conference League. Po marrim të gjitha masat që të jetë një ditë feste për të gjithë. Do të jetë një ditë pa makina në të gjithë Tiranën. Do bllokohen të gjitha akset hyrëse në datën 25. Duhet të vijnë pas orë 6 të pasdites.” tha Ministri.
