Ministrja e re e Shtetit për Mbrojtjen e Sipërmarrjes, Edona Bilali njoftoi përpara mediave kalimin e projektligjit për mbështetjen dhe zhvillimin e “start up”-eve, jo vetëm financiare, por edhe këshillimore.
Pas mbledhjes së sotme të qeverisë, Bilali bëri me dije se të gjithë personat fizikë dhe juridikë në Shqipëri dhe botë, që dëshirojnë të provojnë idenë e tyre të biznesit do të mund të vetëdeklarohen në e-Albania.
“Ky është lajm fantastik për të gjithë ekosistemin që do të rregullohet me ligj të posaçëm. Të gjithë personat fizikë dhe juridikë në Shqipëri dhe botë, që dëshirojnë të provojnë idenë e tyre të biznesit do të mund të vetëdeklarohen në e-Albania. Do të ketë një regjistër të posaçëm për “start up”-et dhe lehtësuesit, institucionet. Nga momenti i regjistrimit do të kenë 24 muaj kohë që është e inkubimit, që do të marrin këshillim pranë ministrit të shtetit për sipërmarrjen. Regjistrimi dhe marrja e shërbimeve do të jetë pa pagesë. I gjithë procesi i regjistrimit dhe aplikimit për grante do të jetë online dhe pa kontakt fizik. Ky është hapi i parë dhe më i rëndësishmi, por nuk është i vetmi, pasi do të vijojmë. Do të ketë 10 mln euro mbështetje, shuma është 5 herë më e madhe, e shpërndarë për 4 vite. Nis nga 2022”, tha ajo.
