Pas gatishmërisë së ish-presidentit Hashim Thaçi për të bashkëpunuar me Dhomat e Specializuara ka reaguar edhe Franca.
Ministria e Punëve të Jashtme e Francës përmes një deklarate për mediat, e ka çmuar lart dinjitetin e treguar nga Presidenti i Kosovës, Hashim Thaçi, i cili dha dorëheqje për të respektuar punën e Dhomave të Specializuara dhe Zyrën e Prokurorit të Specializuar.
“Ne e përshëndesim dinjitetin të cilin ai e ka treguar, duke respektuar kështu punën e Dhomave të Specializuara për Kosovën dhe Zyrën e Prokurorit të Specializuar. Ne e rikujtojmë, po ashtu, lidhjen tonë dhe përkrahjen tonë për Dhomat e Specializuara për Kosovën. Autoritetet franceze nuk i komentojnë vendimet e drejtësisë ose procedurat juridike në zhvillim. Franca e rikujton përndryshe përkrahjen e saj konstante për procesin e dialogut ndërmjet Serbisë dhe Kosovës, me ndërmjetësimin e Bashkimit Evropian”, shkruhet në njoftimin e ministrisë së Francës.
