Kryedemokrati Lulzim Basha ka komentuar sërish skandalin e inceneratorëve dhe gjetjet e Komisionit Hetimor ku ngriti pyetjen se nëse kishte mundësi të mos e dinte kryeministri Edi Rama për dhënien e 23 mln eurove me 17 akte brenda një dite.
Në një konferencë për mediat, Basha deklaroi se gjatë javës së kaluar në komisionin hetimor për inceneratorët janë dhënë dëshmi tronditëse, ndërsa shtoi se ata janë zyrtarë të detyruar të firmosin dhe për këtë arsye belbëzojnë ne lot në sy.
“Të dashur shqiptarë që na ndiqni, ku dëgjoni këto fakte çfarë ere ju vjen, çfarë ere qelbet. Për një copë letër ju sjellin vërdallë me ditëm, me javë, me muaj ndërsa këta për një ditë kalojnë 17 akte zyrtare, një personi që nuk ka asgjë. E shpallin fitues ditën që ka bërë ofertën dhe i japin 23 mln euro paratë tuaja. Çfarë ere vjen kjo. Kjo vjen era vjedhje, vjedhje e pastër. Duket sikur e nderon kur i thua korrupsion.
Pyetja e dytë që kam…se të gjitha këto kanë dalë me dëshmi, doli drejtoresha e prokurimeve publike tha unë s’kam asnjë dokument për inceneratorin e Elbasanit, ndërkohë si është prokuruar, me firmë të kujt, kush ka firmosur? Engjëll Agaçi, sekretari i përgjithshëm i Kryeministrisë. A ka mundësi në këtë Shqipëri, me këtë njeri që kemi të ulur në karrigen e kryeministrit që të bëhen 17 akte në ditë, të ketë mendime kundër nga institucionet kryesore që e kanë parë që është në shkelje të ligjit, që agjencia e prokurimeve publike mos të dijë asgjë, që sekretari i përgjithshëm të firmosë diçka që rezulton në 23 mln euro pagesa nga shteti, pa e ditur Edi Rama? Po kjo a ka mundësi? Si jua pret mendja, bashkëqytetarët e mi të dashur nga Saranda në Malësi të Madhe, nga Kepi i Rodonit tek dogana e Bilishtit, në të katër anët e vendit, si ua pret mendja? A ka mundësi të ndodhë pa e ditur Edi Rama?”, deklaroi Basha
Sipas kreu të demokratëve ky komision ka faktuar denoncimet e PD. Siç thotë ai, askush nuk ka ngjyer gishtin pas shpinës së kryeministrit sepse nuk është bërë asgjë pas shpinës së tij.
