Në kohën kur Rusia po përdor agresionin e ushtarak për të kryer gjenocid, duke ekzekutuar fëmijë dhe civilë të pafajshëm ukrainas, presidenti Vladimir Putin ka risjellë në diskutimin me shefin e OKB-së Kosovën duke e krahasuar shpalljen e pavarësisë së saj me gjendjen në Ukrainë.
Kujtojmë se nuk është hera e parë që Putin e përdor Kosovën duke e krahasuar me situatën në Ukrainë. Rasti konkret ka qënë në ditën që presidenti rus deklaroi se Rusia po organizon “një operacion special ushtarak” në Ukrainë ku përmendi pavarësinë e Kosovës nga Serbia me anë të ndërhryjes së Nato-s për të justifikuar sulmin ndaj Ukrainës për aneksim territori.
Gjatë takimit me Sekretarin e Përgjithshëm të Kombeve të Bashkuara, Antonio Guterres ka përdorur pavarësinë e Kosovës duke tentuar të arsyetojë pushtimin rus të Krimesë në vitin 2014 dhe ndërhyrjen në rajonin e Donbasit në Ukrainën lindore.
“Unë e mbaj mend mirë dokumentin e Gjykatës Ndërkombëtare të Drejtësisë rreth Kosovës. E kujtoj mirë vendimin e Gjykatës Ndërkombëtare, i cili thotë se, ‘zbatimi i të drejtës për vetëvendosje për territorin e secilit vend dhe nuk duhet të kërkojë leje për ta deklaruar sovranitetin nga ai vend’. Kjo është e shkruar në relacion me Kosovën dhe ky vendim është përkrahur nga të gjithë. Nëse është kështu, atëherë Republika e Donbasit dhe ajo e Doneskut kanë të njëjtat të drejta duke mos zbatuar autoritetin qendror në Kiev për ta deklaruar sovranitetin, pasi që precedenti ekziston”, ka thënë Putin gjatë këtij takim.
Në anën tjetër, Guterres ka tentuar të gjejë arsye përballë Putinit, thotë se OKB-ja prapëseprapë nuk e ka njohur pavarësinë e Kosovës.
“Para së gjithash, Kombet e Bashkuara nuk e kanë njohur Kosovën”, është përgjigjur Guterres.
Gjithsesi Putin ka vazhduar, duke thënë së OKB-ja nuk e ka njohur, por Kosovën e ka njohur si shtet Gjykata Ndërkombëtare e Drejtësisë.
“Por, Gjykata Ndërkombëtare e ka njohur Kosovën. Nëse presidenti ekziston, atëherë Republika e Donbasit duhet të veprojë në të njëjtën mënyrë, e tashmë e kanë bërë. Nga ana e jonë i kemi pranuar si shtete të pavarura. Shumë shtete kanë vepruar në këtë mënyrë, përfshirë oponentët tanë në relacion me Kosovën, ku shumë shtete në botë e kanë njohur atë. Ky është një fakt. Ne do ta bëjmë të njëjtën me Republikën e Donbasit”, deklaroi presidenti rus.
Presidentja e Kosovës, Vjosa Osmani dhe kryeministri Albin Kurti që nga nisja e agresionit rus në Ukrainë kanë thënë se, Rusia dhe Putini janë kërcënim serioz për destabilizimin e Ballkanit, në veçanti Kosovës dhe Bosnje dhe Hercegovinës, duke përdorur Serbinë si shtet që i investon në destabilizimin e rajonit.
