Punonjësit e fasonerisë në Kuçovës kanë protestuar për të dytën ditë radhazi përpara Drejtorisë së Tatim-Taksave Berat. Për shkak të mungesës së mjeteve urbane dhe autobuzave, ata e kanë përshkruar qytetin e Beratit në këmbë por janë ndaluar nga policia në afërsi të Urës së Varur.
Pas shumë debateve me forcat e policisë, që shoqëruan në polici disa prej protestuesve, të tjerët mundën të shkojnë t’i bashkohen protetsës. Shkak për këtë protestë është bërë mos-pagimi i “pagave të luftës” për 159 punonjësit e kësaj ndërmarrjeje që me vendim të qeverisë është mbyllur në datën 9 Prill.
Ata shprehen se, fasoneria ku ata punojnë ka 159 punëtorë dhe të gjithë janë të siguruar por askush nuk ka marrë “pagën e luftës”. Protestuesit kërkojnë tu kalohet menjëherë kjo pagë që u është premtuar nga kryeministri dhe të mos tallen me djersën e tyre.
Gjthashtu punonjësit kanë deklaruar se, në qoftë se nuk u kalon “paga e luftës” siç u është premtuar ata do të përshkallëzojnë protestat e tyre,deri në grevë urie.
