Punimet për rehabilitimin e rrugëve dhe urave ndihmëse të Gazsjellësit transadriatik TAP, zbuluan një objekt arkeologjik i shekullit të VI të erës sonë që i përket një monumenti të hershëm të krishtere.
Lorenc Bejko ekspert i trashëgimisë kulturore ne projektin TAP zbulon disa detaje.
Bejko: Bëhet fjalë për një zbulim të shekullit të VI të erës sonë, kreu i një kolone të një monumenti paleo-kristian. Bëhet fjalë për periudhën e përhapjes së krishterimit të hershëm në territorin e Evropës Juglindore.
Një zbulim i tillë në një zonë të izoluar, siç është Polena e Çorovodës tregon për penetrimin e kësaj feje të re që u bë zyrtare dhe për gjurmët e rëndësishme transformuese kulturore që kjo fe do të sillte jo vetëm në territorin e Shqipërisë por në gjithë Evropën Juglindore.
Ky zbulim ofron fakte të reja mbi rëndësinë e kësaj zone gjatë antikitetit të vonë por nga kontrollet dhe inspektimet e zonës nuk janë zbuluar objekte të tjera arkeologjike.
