Një punëtor ndërtimi ndodhet në gjendje të rëndë në spitalin e Vlorës pas një aksidenti në punë. Burime zyrtare nga policia e Vlorës tha se 30-vjeçari ishte duke punuar në një kantier ndërtimi, kur ka rënë nga kati i tretë i pallatit në ndërtim.
“Rreth orës 11:00, dyshohet se aksidentalisht, gjatë punës për ndërtimin e një pallati në lagjen ‘28 Nëntori’, ka rënë nga kati i tretë i objektit, shtetasi A.Sh., 30 vjeç, banues në fshatin Sherishtë. 30-vjeçari është transportuar në spitalin rajonal të Vlorës, ku aktualisht është në gjendje të rëndë shëndetësore”, thuhet në njoftimin e policisë.
Grupi hetimor po punon për të zbardhur dhe dokumentuar rrethanat e rastit, shtuan të njëjtat burime.
Sektori i ndërtimit vijoj të jetë një ndër më problematikët përsa i përket aksidenteve në punë. Sipas të dhënave të Inspektoratit Shtetëror të Punës dhe Shërbimeve Shoqërore, nga Janari deri në muajin tetor të vitit 2024 u raportuan 138 aksidente në punë, prej të cilave 26 me pasojë vdekjen. Një shifër në rritje kjo krahasuar me vitin 2023 ku u regjistruan 32 aksidente me 8 humbje jete. Ekspertët kanë shprehur shqetësim për mos respektim të protokolleve të sigurisë.
