Ka dalë ekspertiza mjekoligjore për vdekjen e të riut, Lear Kurti, mesnatën e 19 tetorit, pas shoqërimit nga policët e patrullës së Komisariatit numër 3.
Sipas njoftimit të Prokurorisë, shkaku i vdekjes së 32-vjeçarit është helmimi akut me lëndë narkotike të llojit kokainë, megjithëse pikëpyetje për vdekjen e të riut vijojnë të mbeten të shumta.
Njoftimi:
Prokuroria e Rrethit Gjyqësor Tiranë, ka administruar aktin e ekspertimit mjeko-ligjor nr 494/22 datë 14.11.2022, në lidhje me shkaqet e vdekjes së shtetasit Lear Kurti.
Në përgjigje të aktit të ekspertimit mjeko-ligjor, përcaktohet diagnoza Anatomo-Patologjike:
Mbidozim (Helimim) akut me lëndë narkotike e llojit kokainë. Ishemi akute Hypoksite e miokardit e shoqëruar me kontraktim dhe deformim të miofibrilive, edemë e shprehur e trurit, stazë vazale dhe ekstravazat kapilar, atelektazë dhe emfizemë kompesatore e mushkrisë, hepatit kronik persistent.
Shkaku i vdekjes se shtetasit Lear Kurti ka qenë helmimi (mbidozim) akut me lëndë narkotike të llojit kokainë, i komplikuar me shok toksik, me mekanizimin e ishemisë akute të miokardit që ka sjellë për pasojë asistolinë kardiake (Ndalim i menjëhershëm i zemrës)
Vdekja e të riut Lear Kurti pasi u shoqërua në komisariatin e policisë ka lënë ende pikëpyetje të forta pas dëshmisë së miqve dhe familjarëve të tij që bie ndesh me deklaratat zyrtare të institucioneve.
Disa javë më parë, shoku i Lear Kurtit, i cili ishte me Learin në momentin kur këtë të fundit e shoqëruan për në komisariat, deklaroi se 32-vjeçari ishte dhunuar barbarisht në makinën e policisë, ndërsa këta të fundit e mohojnë dhunën e ushtruar.
