Në shekullin 21 duket e paimagjinueshme që të mos komunikosh nëpërmjet rrjeteve sociale, aq më shumë për një politikan. Politika po i përdor këto rrugë komunikimi shumë në të gjithë botën. Nuk ka kryeministër e president që të mos ketë faqe në Facebook e Twitter. Por mesa duket është një politikan në Shqipëri që jo vetem nuk i perdor, por i urren rrjetet sociale. I ftuar në emisionin “Opinion” në TV Klan, në prag të Kongresit të Partisë Socialiste, ku Ben Blushi po kërkon të bëhet kryetar partie, ai u pyet nga gazetarja Anila Basha, përse mungon në të gjitha rrjetet sociale.
“Nuk jam në Facebook, Twitter, apo Instagram sepse komunikimi në këto rrjete sociale më duket fals”, ka thënë politikani dhe autori 47-vjeçar i disa romaneve. “Madje unë as nuk di të hap një llogari në Facebook. Jo për arsye teknologjike, sepse atë edhe një fëmijë 10 vjeç di ta bëjë, por sepse nuk më intereson”.
Ben Blushi ka ironizuar edhe kolegë të vet të partisë që përdorin “Instagramin si pasqyrë”, që postojnë fytyrën, apo këpucët e tyre. “Unë komunikoj me ide, jo nëpërmjet fotove”, tha ai.
