Një çift austriak ka 12 vite që vjen me pushime në Shqipëri dhe kujtojnë se herën e parë përballeshin me pasigurinë se si do ishte ky vend dhe vërtetuan të kundërtën.
Friederike dhe Wilhelm Neuhold nga Austria erdhën për herë të parë në Ksamil 12 vite më parë. Që atëherë ata rikthehen vazhdimisht në qytezën buzë Jonit, ku tashmë qëndrojnë më shumë.
“Ksamili më pëlqen, njerëzit janë të sjellshëm. Të gjithë na kanë ndihmuar me çdo problem që kemi pasur. Kemi ardhur që prej qershorit të vitit që shkoi dhe jemi ende këtu.”
Kujtojnë se kur miqve u thanë se do të shkonin për një vit në Shqipëri, e morën për ide të rrezikshme. Sot duket se kanë ndryshuar mendje. Disa prej tyre i kanë vizituar në Ksamil.
“Shumë njerëz na thonë pse shkoni atje, është e rrezikshme!Unë u them që nuk është fare e rrezikshme, njerëzit janë miqësore dhe nuk ka probleme. Dy vajzat tona me fëmijët e tyre të vegjël kanë ardhur dhe na kanë vizituar këtu.”
Wilhelm thotë se është dashuruar me klimën dhe bukuritë e Ksamilit. Nuk kupton se përse ka turizëm vetëm tre muaj.
“Koha më e bukur është nga prilli deri në qershor. Në verë është vapë, ndërsa në shtator-tetor është sërish bukur. Sezoni duhet të jetë më i gjatë. Duhet të zgjasë nga marsi deri në nëntor”.
Shëtitjet buzë detit, noti, miqtë e rinj shqiptar përbëjnë përditshmërinë për çiftin austriak. Rrugët me gropa dhe mungesa e ujit të pijshëm janë të papranueshme për ta.
“Infrastruktura është problem, kudo ka gropa. Në ditët me shi rruga mbulohet nga uji.”
Teksa nuk mungojnë udhëtimet brënda Shqipërisë, nga të cilët ata veçojnë Korçën.
“Nuk blejmë shtëpi, pasi dua të lëvizim, të shikojmë zona të ndryshme. Vendi më i bukur është Korça. Ishte shumë interesante dhe i ndryshëm nga qytetet buzë detit.
Frederike 75 vjeçe dhe Wihlem 78 do të largohen nga Ksamili në maj, atëherë kur turistët shtohen.
