Ditën e premte Partia Socialiste do të mbledhë Kryesinë, në orën 17:00 të pasdites, ku do të diskutohet në lidhje me emrin e Presidentit të ri të vendit, që pritet të kalojë për votim me shumë mundësi të hënën e ardhshme.
Në këtë mbledhje do të jetë i pranishëm dhe vetë kryeministri Edi Rama, pas kthimit të tij nga një vizitë zyrtare në SHBA.
Tashmë socialistët kanë mundësi që të zgjedhin të vetëm emrin e presidentit të ri të vendit, duke qenë se Kushtetuta parashikon që kreu i shtetit në raundin e katërt dhe të pestë mund të zgjidhet me 71 vota deputetësh.
Palët dështuan që të gjenin një marrëveshje me bazë të gjerë për pasuesin e Ilir Metës në Presidencë, me opozitën e përçarë, ku një pjesë u bë palë në proces, dhe pjesa tjetër mbeti e përjashtuar.
