Në Elbasan, policia ka nisur procedim penal ndaj organizatorëve dhe pjesëmarrësve në tubimin e djeshëm të opozitës, ku për një orë u bllokua lëvizja e makinave në akset kryesore të vendit. Mes personave që janë dërguar për procedim penal janë dhe deputetët Luçiano Boçi dhe Edmond Spaho. Emra të tjera janë Ismail Elezi, Aurel Bylykbashi dhe Florenc Hoxha.
Njoftimi i policisë:
Më datë 24.04.2017, u referuan materialet në Prokurorinë e Rrethit Gjyqësor Elbasan, për shtetasit Luçiano Dhimitër Boçi, Edmond Shyqyri Spaho, Ismail Shefit Elezi, Aurel Medai Bylykbashi dhe Florenc Fatmir Hoxha, të datëlindjes 26.03.1967, 14.11.1958, 12.08.1961, 22.12.1966 e 14.06.1975, banues në Tiranë, sepse në orën 11:00 deri në orën 12:00, në fshatin Bradashesh, kanë organizuar dhe marrë pjesë në tubim të paligjshëm duke penguar qarkullimin e mjeteve të transportit. Po punohet për identifikimin e pjesëmarrësve të tjerë në tubim.
