Tragjedia e Himarës, ku një vogëlushe vetëm 7 vjeç u vra me skaf nga komisari Arjan Tase mblodhi shumë qytetarë në protestën e së enjtjes para Ministrisë së Brendshme.
“Nuk e vrau varka, por shteti”, ishte protesta e organizuar nga shoqëria civile ku kërkohej drejtësi për vogëlushen Jonada Avdia. Në demostratë morën pjesë dhe deputetë dhe përfaqësues të forcave politike opozitare si Partia e Lirisë dhe Partia Demokratike.
Qindra qytetarë u solidarizuan me dhimbjen e familjes Avdia ku kërkuan drejtësi nga autoritetet për vrasjen në plazhin e Potamit dhe bënë thirrje për shkarkimin e Drejtorit të Policisë, Gledis Nano, ministrit të Brendshëm, Bledi Çuçi dhe ministren e Turizmit, Mirela Kumbaro.
Protestuesit me fëmijët në duart ndezën qirinj para godinës së Ministrisë së Brendshme dhe Kryeministrisë.
Në mbyllje të protestës qytetarët nga sheshi para Presidencës, qytetarët protestues lëshuan një ultimatum në drejtim të kryeministrit Edi Rama, duke kërkuar që deri të hënën të shkarkohen dy ministrat sipas tyre përgjegjës, ose në të kundërtën protestat nuk do ndaleshin.
Ndërkaq shoqëria civile ka publikuar posterin kryesor të tubimit të radhës që do mbahet të hënën në orën 19:30.
