Fermerët e zonës së Melgushës në Bashkinë Vau i Dejës dolën ditën e sotme në protestë për rritjen e çmimit të naftës. Me pankarta në duar ata shprehen se nuk kanë përfituar nga skemat e qeverisë për marrjen e naftës me rimbursim. Ata hedhin akuza ndaj qeverisë dhe pretendojnë se naftën e kanë përfituar të tjerë në bazë të preferencave politike.
“I bashkohem protestës në mbështetje të fermerëve, kanë nevojë që të përfaqësohen. Gjendja e të rinjve sot është skandaloze, dëshira e të rinjve sot është ikja. Thirrja ime është për kthim e reflektim për fermerët“, tha një nga protestuesit.
“Ne jemi në mbështetje të fermerëve të Vau Dejës në këtë protestë paqësore. Sa i përket abuzimeve, vjedhjeve që po bëhen në mënyrë drastike për subvencionet për shpërndarjen e naftës, jam sot këtu. I bëj thirrje ministres Krifca sepse ka informacionin e duhur, e bollshëm sa i përket abuzimeve që po ndodhin me fermerët për subvencionet e naftës. Në këto momente që flasim janë shpërndarë mbi 120 mijë litra naftë, ku në listën e përfituesve janë regjistruar 350 fermerë. Ka fermerë që kanë përfituar 3 mijë litra naftë dhe nuk kanë asnjë pëllëmbë të sipërfaqes së tokës të punueshme”, tha një prej protestuesve.
Protestuesit bllokuan aksin rrugor që lidh Shkodrën me Lezhën, ndërkohë që në zonë kishte edhe forca policore. Ditën e sotme po për rritjen e çmimit të naftës do të mbahet protestë në Tiranë. Qytetarët do të mblidhen në orën 18:00 përballë kryeministrisë.
