Mesditën e sotme në rotondon e Plugut fermerët e Myzeqesë kanë dalë në protestë duke kundërshtuar paketën e re fiskale për vendosjen e 10% të TVSH-së për imputet bujqësore ndërkohe që çmimi i tyre është rritur nga kriza energjitike globale.
Duke folur për mikrofonin e “Fax News”, fermerët e kësaj zone i kërkojnë qeverisë që të japë subvencionet, ndërsa theksojnë se prodhimet e tyre nuk po shiten. Një fermer që ka investuar në këtë zonë thotë se do të mbyllë aktivitetin e tij dhe do të rikthehet sërish në emigrim pasi qeveria nuk i ka përkrahur duke i lënë me borxhe nëpër banka.
“S’kemi marrë asnjë subvencion, çmimet janë rritur, malli nuk shitet po i hedhim gjitha në plehra. Kemi 30 vite që merremi me bujqësi, asgjë nuk po shitet”, tha një grua fermere.
“Ne kemi ardhur nga emigrimi kemi investuar dhe po mendojmë të ikim sërish në emigrim, jemi të zhgënjyer qeveria nuk na jep subvencione. Jemi ne borxhe në bankë. Emrat kanë dalë që jemi fitues të subvencione por nuk kemi marrë asnjë lekë. Shteti t’i japë zgjidhje”, u shpreh fermeri.
“Nëse unë do të punoja diku tjetër punoja 8 orë kurse tek puna ime punoj 16 orë. Ne jemi motori kryesor i furnizimit për prodhimet bujqësore. I kërkojmë qeverisë që të reagojë”, tha një djalë i ri.
Kreu i qeverisë ka postuar një fotografi në rrjetet sociale ku i përgjigjet protestës së fermerëve teksa shkruan: “Mbështetje për fermerët +42 % krahasuar me 2021 ose e thënë ndryshe 7.1 miliardë mbështetje për fermerët dhe investime në zhvillimin rural.
