Ka nisur protesta kundër rritjes së çmimeve në Tiranë, ndërsa kauzës së qytetarëve i janë bashkuar dhe figura publike si deputetja demokrate, Jorida Tabaku. Dhjetëra qytetarë me pankarta në duar u mblodhën në sheshin “Skëndërbej” dhe më pas marshuan drejt Kryeministrisë. Qytetarët kërkojnë ulje të çmimeve ndërsa thonë se nuk do të ndalen deri sa të arrijnë qëllimet e tyre.
“Sot shumë shqiptarë nuk arrijnë të blejnë qumësht, vaj e ushqime të tjera bazike, sepse nuk kanë para mjaftueshëm, sepse pagat e tyre janë shumë të ulëta, pensionet janë shumë të ulëta, ndihma ekonomike është qesharake. Ndërkohë, çmimet vetëm rriten. Midis prillit dhe majit, në vetëm një muaj, çmimet e produkteve ushqimore janë rritur me 20-30%, sipas statistikave reale, ndërsa rritja reale mund të jetë edhe më e madhe”.-u shprehën disa nga protestuesit.
