Në një moment që pedagogët po protestojnë për rritje pagash dhe kushte më të mira pune, kryeministri Edi Rama ka vendosur t’iu kundërpërgjigjet nga Universiteti Bujqësor i Tiranës.
Rama deklaroi se kjo kategori nuk ka rroga fikse, por ndodhen në një hapësirë kur mund t’ia bëjnë vetes pagën deri në 5-fish përmes fondeve. Ai u shpreh se në mbledhjen e të mërkurës, qeveria do të vendosë një rritje prej 7%, teksa shtoi se do të jetë vetë universiteti ai që do të ketë autonomi brenda kësaj kuote.
“Atyre që dalin në rrugë dhe kërkojnë rritje page ju them që nuk jeni mësues, as mësues gjimnazi dhe as mësues 9-vjeçareje. Nuk jeni as mjekë as infermierë. Gjithë këta, nuk jeni as punonjës policie dhe as ushtarakë. Nuk jeni as pensionistë. Të gjithë këta marrin një pagë dhe një pension fiks. Ndërkohë që pedagogët janë në hapësirë të ndërmjetme mes mbështetjes shtetërore dhe horizontit ku mjafton të duash dhe ia bën vetes rrogën edhe 5-fish. Me fondet e tjera. Janë fondet e vetëfinancimit. Janë fondet europiane dhe të universiteteve të tjera private ku shkohet dhe bëhet dhe mësim. Këtu ka një histori tjetër të pagave të deklaruara pjesërisht. Kemi paga që nuk përkojnë me të vërtetën. Por nuk është ky problem. Por këtu ka një fakt. Do të bëjmë një rritje pagash të mërkurën a të enjten prej 7% por do i njohim universitetit të drejtën për të rritur pagën sipas vendimmarrjes së vet. Nuk janë të gjithë njësoj. Universiteti është autonom. Zhvillohet në një hapësirë të ndërmjetme mes shtetit dhe tregut”, tha Rama.
