Kryetari i Partisë Demokratike Sali Berisha deklaroi se më datë 12 mars, kryengritësit paqësorë do kërkojnë para parlamentit largimin e menjëhershëm të Ramës.
Në një konferencë për shtyp, ai u shpreh se, opozita do të jetë në kryengritje të vazhdueshme. Sipas tij, qëllimi i vetëm i Partisë Demokratike, është largimi dhe dorëheqja e Kreut të Qeverisë, Edi Rama.
“Koha e diktatorëve po perëndon në nivel global. Shqiptarët do i japin përgjigjen e merituar.
Me asgjë Edi Rama nuk mundet t’i shpëtojë krimeve të rënda që ka kryer, grushteve të shtetit që tentoi të realizojë, mburojës ligjore që kërkon t’i vendosë vetes për të dalë jashtë përgjegjësisë para ligjit. Përpjekjes së tij për të shpallur vjedhjet legjitime për qeveritarët. Të gjitha këto janë ftesë për shqiptarët. Protesta e tyre, kryengritja ne tyre paqësore është shpresa e fundit e shpëtimit të Shqipërisë dhe shqiptarëve nga Edi Rama.Kohërat janë kritike.
Në këtë kohë, ai fakton se është i aftë të bëjë gjithçka në shkelmim të interesit kombëtar të shqiptarëve. Veçanërisht në këtë kontekst, letra e hapur që firmosi së bashku me padronin e tij, Aleksandër Vuçiç, me të cilin, shqiptarëve që u premtoi pasaportën, u garanton pasaportën serbe, meriton të ndëshkohet me të gjitha format si tradhti e lartë kombëtare.
Data 12 është data e kryengritësve paqësorë shqiptarë, në të cilën ata do mblidhen para parlamentit për të kërkuar largimin e menjëhershëm të Edi Ramës.
Kryengritja paqësore e qytetarëve shqiptarë ka synim madhor shpëtimin e shqiptarëve nga ky regjim dhe rikthimin e votës së lirë tek ata.
As një Lubi, as 10 Lubi nuk janë objektivat e kësaj kryengritje.
Objektivi i saj është largimi i Edi Ramës me urgjencë nga pushtetit.
Një dhe vetëm një, do të jetë vetëm një.
I panegociueshëm.
Edi Rama ka zero legjitimitet në pushtet ndaj dhe duhet të largohet.
Kam bindjen se qytetarët janë më të vendosur se kurrë në qëndrimet dhe vendimet e tyre.
Data 12 është dita e tyre.
Ju lutem, protesta ka vetëm një qëllim, largimin e Edi Ramës. Nuk thërrasim ne protestë për asnjë qëllim tjetër, përveç largimit të Edi Ramës. Kjo është përfundimtare. Pse thirret atë ditë apo këtë ditë, ajo është diçka tjetër sepse do jetë edhe tjetra, me radhë e me radhë. Ne jemi në kryengritje të vazhdueshme.
Por protesta thirret, edhe njëherë ta ketë të qartë çdo shqiptar, thirret për largimin e Edi Ramës nga pushteti. Edi Rama duhet të japë menjëherë dorëheqjen. Kërkesa e qytetarëve është largimi i tij dhe dorëheqja e tij. Pra, nuk ka të bëjë. Nuk kemi asnjë lloj. Nuk ka lidhje tjetër, përveç Edi Ramës protesta jonë”, u shpreh Berisha.
