Seanca e sotme plenare në Kuvend ka nisur me një minutë heshtje në nderim të minatorit Muharrem Plaku, i cili mbeti i bllokuar disa ditë më parë në një nga galeritë e minierës së Bulqizës dhe si pasojë ka ndërruar jetë.
Kjo kërkesë është bërë nga deputetja e PD Dhurata Çupi. Ndërsa kryetari i grupit parlamentar i PS, Taulant Balla tha se këto kërkesa bëhen paraprakisht dhe kërkoi që para se të ndërmerret ky hap në sallë të jetë i pranishëm, kryetari i grupit parlamentar të PD, Alfred Rushaj.
Dhurata Çupi: Një minator humbi jetën në Bulqizë. Do të donim të mbanim një minutë heshtje.
Taulant Balla: Kërkesa të tilla bëhen paraprakisht dhe le të jetë ky rast, rasti i fundit kur bëhet kjo gjë. Kryetarja e Kuvendit duhet të thërritet në kohë. Unë po kërkoj të vij kryetari i grupit parlamentar i PD. Dakord, le të mbahet 1 minutë heshtje.
