Pasi humbi mandatin e kryetarit të Bashkisë Kavajë, nga ligji i dekriminalizimit, tashmë Elvis Rroshi do të përballet në gjykatë me akuzën “Falsifikimi i vulave, stampave apo formularëve”.
Prokurori i Prokurorisë së Rrethit Gjyqësor Tiranë, Enklid Gjini dërgoi në gjykatë dosjen hetimore në ngarkim të Rroshit.
Ai nuk deklaroi masat e sigurisë dhe dënimet ndaj tij në disa vende evropiane, të cilat ishin detyrim për tu deklaruar në formularin e Dekriminalizimit.
“Rroshit i është vërtetuar e kundërta e përgjigjes mohuese për dënim për vepra të ndryshme nga ndonjë autoritetet i huaj”, sipas prokurorisë.
Ai ka fshehur përdorimin e disa emrave në të shkuarën e tij të arrestimeve, ndalimeve, dënimeve, dëbimeve, masave të ndryshme të sigurisë në Itali, Zvicër dhe Gjermani, falsifikim dokumentash, shqiptare dhe të huaja.
Gjithashtu në vitin 2015, DEA/US ka informuar autoritetet zviceriane se ata po hetonin një shtetas të quajtur Enver Rroshi për trafik droge dhe pastrim parash. Autoritetet zviceriane po kryejnë hetime të mëtejshme, nëse do të ketë më shumë informacion.
