Të gjitha bizneseve të mëdha, që janë subjekte të TVSH-së dhe të tatimit mbi fitimin, do ju dyfishohen gjobat nëse nuk deklarojë pagat reale të punonjësve.
Në ndryshimet e reja ligjore në ligjin për procedurat tatimore të hedhur për konsultim publik, është saktësuar që të gjitha bizneset e mëdha që nuk deklarojnë pagat reale të punonjësve do të gjobiten me 200% të vlerës së detyrimit dhe të kontributit të papaguar.
“Projekti vetëm për subjektet e regjistruara me përgjegjësi tatimore të TVSH-së dhe Tatim Fitimit për këtë shkelje parashikon një rritje të masës së gjobës nga 100 në 200 përqind të detyrimit dhe kontributit të llogaritur. Propozimi i këtij akti vjen si pasojë e vlerësimit të shmangies nga pagimi i detyrimeve tatimore te pagës dhe kontributeve të sigurimeve shoqërore e përqendruar në kategorinë e subjekteve të regjistruara me përgjegjësi tatimore të TVSH dhe tatim fitimit”, thuhet në relacion.
Ndërsa bizneset e tjera që nuk janë pjesë e TVSH-së dhe Tatimit mbi Fitimit nëse nuk deklarojnë punonjësit, do gjobiten në masën 100% të detyrimit.
Vetëm në 3 vitet e fundit Ministria e Financave thotë se janë vendosur 1025 gjoba nga administrata tatimore për biznesin e madh për mosdeklarim të punonjësve dhe fshehja e pagës, me një vlerë prej 142,336,266 lekë.
