Autori i sulmit terrorist në Arenën e Manchester të Anglisë është 22 vjeçari Salman Abedi, me origjinë nga Libia.
Prestigjozja britanike “The Sun” shkruan se 22 vjeçari, rritur në Britani ishte bërë pjesë e organizatave terroriste gjatë kohës sa kishte shkuar në Libi për të vizituar familjarët e tij, të cilët jetonin atje.
Gjatë kontrollit të shtëpisë së tij, aty u gjet mes tjerash, edhe një libër bazik për substancat kimike, të cilat ai mund t’i ketë përdorur për prodhimin e bombave. Ndërkohë, Kryeministrja britanike Theresa May ka ngritur nivelin e alarmit në maksimum, duke nxjerrë ushtrinë në rrugë për të asistuar në ofrimin e sigurisë.
Abedi ka lindur në Mançester 1994, ndërsa prindërit e tij ishin larguar nga Libia pasi u bënë kundërshtarë të regjimit shtypës të kolonel Gaddafit.
Pasi kaloi disa vjet në Londër, familja u zhvendos në Mançester, ku babai i tij bënte thirrjen për t’u lutur në një xhami në Didsbury.
Abedi shkoi në shkollë në Mançester dhe në Universitetin Salford përpara se të dilte jashtë dhe të punonte në një furrë buke. Miqtë e kujtojnë atë si një futbollist të mirë, një mbështetës i Manchester United dhe një përdorues i kanabisit.
Ai kishte një motër dhe dy vëllezër. Nëna dhe babai i tij tani besohet se u kthyen në Libi, dhe për një kohë ai u largua gjithashtu nga Britania e Madhe, por besohet të ishte kthyer ditët e fundit.
