I ftuar në “Intervista e Ditës” në Fax News, deputeti i Partisë Demokratike Luçiano Boçi ka komentuar aktualitetin politik në vend por edhe situatën brenda selisë blu.
Fillimisht ai u ndal tek çështja “Balluku” , ku u shpreh ndër të tjera se, kryeministri Edi Rama duhej ta linte drejtësinë të bënte punën e vet, ndërsa paralajmëroi se mazhoranca po synon ta çojë kërkesën e SPAK për imunitetin drejt ngërçit përmes procedurës.
Sa i përket votimit të Avokatit të Popullit, Boçi u shpreh:
“Është një çështje që ka marrë shumë vëmendje. Çfarëdo lloj fjale që të rëndis unë tani, e drejta nuk është te fjala, nuk është te parashtrimi. E drejta është te emocioni, është te reagimi. Kur të vijë një moment që fjalët të kenë vlerën e tyre dhe dëgjesën e tyre atëherë dhe unë do të hyj tek pjesa e fjalëve dhe besoj që sot çështjet që prevalojnë në situatën politike janë qëndrimet e drejtësisës së Ramës në raport me Ballukun, çështja e korrupsionit të Ballukut, çështja e korrupsionit në AKSHI, që ka qenë portofoli personal i Ramës ku janë vërtitur miliarda euro që janë kanalizuar si përfitime, si interesa, pse jo edhe në atë pjesën e devijimit të vullnetit të shqiptarëve në zgjedhjet e 11 majit”.
Sa i përket situatës brenda Partisë Demokratike, Boçi u shpreh se problemi kryesor i saj, aty ku duhet investuar, është bashkimi.
“A është e bashkuar PD-ja? Këtu më ke ngacmuar në një perceptim apo shqetësim që unë e kam paraqitur. Nëse PD ka një sfidë, ka bashkimin, nuk ka sfida të tjera. Nuk ka krizë lidershipiSali Berisha është kryetar i partisë dhe kjo nuk ka diskutim. Jo se e them unë apo se e kam dëshirë unë, apo se jam unë nënkryetar i PD por sepse kështu e kanë vendosur anëtarët me votën e tyre. Sot problemi më i madh që ekziston në PD është pikërisht bashkimi. Bashkimi u iniciua, pati një gradacion rritje në prag të zgjedhjeve dhe nuk vazhdoi. Dhe unë mendoj që përtej zgjedhjeve ky është elementi ku ne duhet të investohemi. Ky bashkim duhet të ndjekë disa kanale komunikimi. Bërja e analizës, kontakti me anëtarësinë, kontakti me njerëzit dhe ajo që shpesh është thënë por nuk është kuptuar, por që mbahet si tezë edhe nga opinionistët, hapja e Partisë Demokratike. Nuk ka qenë e mbyllur. Por ne e përdorim si stimul, hapja. Që në strukturat e PD-së të vijnë ata që kanë patur një mërzitje, kundërshti brenda PD-së, qëndrim të ndryshëm apo kundër në një moment që është krucial për fatet e vendit. Të gjithë të bashkohen sepse na ndajnë opinionet por na bashkojnë qëllimet”, tha nënkryetari dhe deputeti i PD, Luçiano Boçi .
