Revista pretigjioze italiane “Dove” e grupit mediatik Corriere della Sera, i dedikon Shqipërisë kopertinën e muajit maj, me titullin “Surpriza Shqipëria. Gati për një ekplorim të ri?”
Gazetarët e kësaj reviste kanë udhëtuar për disa ditë në jugun e Shqipërisë dhe në një reportazh të gjatë rrëfejnë për lexuesit italianë bukurinë natyrore, mikpritjen, historinë, artin e gatimit, kulturën e jetën e përditshme të një vendi që ndodhet vetëm 70 milje largësi detare nga brigjet italiane, por që njihet kaq pak.
Me fotografi që përcjellin imazhe të mrekullueshme të plazhit të Dhërmiut, Vlorës, Sarandës, Drimadhes e Llogaras, ky reportazh fton turistët italianë të vizitojnë një vend që po ndryshon, i virgjër, i panjohur, por me një bregdet me ujëra të kristalta, plazhe të lira me rërë të imët e të bardhë.
“Një bukuri që zbulohet dalëngadalë ndërsa udhëton me makinë, kthesë pas kthese e mal pas mali.”- shkruhet në revistën “Dove”.
“Dhe pse pika e fortë është deti, në Shqipëri gjenden 3 site të UNESCO-s, në Berat, Gjirokastër e Butrint, si dhe 15 parqe kombëtare e 10 zona arkeologjike ku koha duket se ka ndalur”- thuhet në reportazh./ora news
