Presidenti Ilir Meta ka reaguar lidhur me situatën problematike si pasojë e reshjeve, ndërsa i ka bërë apel qytetarëve që të bashkëpunojnë me forcat e emergjencave.
Përmes një postimi në rrjetin e tij social Facebook, Meta i ka shprehur solidaritetin e tij të gjithë familjeve në vështirësi.
“Të dashur qytetarë, në këtë situatë emergjente të rreshjeve, të cilat nuk kanë të ndalur prej ditës së djeshme, jam me çdo familje në vështirësi, duke iu shprehur solidaritet të plotë.
Dua t’i ftoj të gjithë të bashkëpunojnë me forcat e ushtrisë, policisë dhe Emergjencave Civile që janë në terren, duke i falenderuar dhe inkurajuar që të vazhdojnë të jenë pranë qytetarëve për të kaluar këtë situatë dhe parandaluar përshkallëzimin e saj.
Falenderoj mediat për informimin, lehtësimin e komunikimit dhe bashkëpunimin me qytetarët dhe autoritetet”, shkruan Meta.
