Në konferencën nga selia blu, ish-kryeministri Sali Berisha u pyet dhe për emrin e Presidentit të ri. Berisha u shpreh se kryeministri Rama mund ta zgjedhë presidentin e ri sepse votat i ka, por s’mund të implikojë opozitën aktuale në këtë proces.
Gjithashtu, ish-kryeministri tha se emri i tij ka filluar t’i kallë datën Ramës, pasi sipas tij ai pëlqehet edhe nga socialistët dhe se PS me Ramën do të kenë probleme serioze me opozitën.
“Së pari në qoftë se Edi Rama vendos të zgjedhë me votat e tij presidentin mund ta bëjë këtë sepse pavarësisht se zgjedhjet i plaçkiti dhe ato nuk shprehën vullnetin e popullit për fat të keq, komuniteti ndërkombëtar vazhdon t’i dënoje dhe opozita nuk i doli zot votës së qytetarë. Rama mund ta zgjedhë, por ai nuk mund të implikojë opozitën aktuale në këtë proces. Ndaj edhe preferoj që të mos angazhohemi në një diskutim që nuk i ka ardhur koha akoma. Por me lejoni tu jap një këshillë; mos harroni dhe asnjëherë të mos e pyesni për inceneratorët sepse do të vrapojë dhe do të dalë jashtë. Sa më pak t’i përmendi emrin tim sepse e patë mbrëmë dhe e shikoni çdo ditë sesi ky emër ka filluar t’i kallë datën. Ai e di që unë jam i pëlqyer edhe nga socialistë të thjeshtë, por e di se ai do të ketë probleme shumë serioze me PD-në. Prandaj këto dy gjëra nëse doni që të mos iu ikë mos e pyesni”, deklaroi Berisha.
