Deputetja e Partisë Socialiste Mimi Kodheli ishte e ftuar ditën e sotme në emisionin “Radari Informativ” në Abc, ku ka folur për zgjedhjen e presidentit të ri, ku në të cilat edhe emri i saj është lakuar shpesh në media për të qenë kryetarja e re e shtetit.
Gjatë intervistës, e pyetur nga moderatorja Xhokaxhi se si ajo ndihet kur dëgjon se emri i saj lakohet për të qenë numri një i shtetit dhe a e beson realisht këtë gjë, Kodheli tha se kjo është diçka që të përkëdhel sedrën, por nga ana tjetër të jep dhe shumë përgjegjësi.
“E vlerësuar jashtë mase. Vetëm ideja që të del emri për pozicionin më të lartë shtetëror ta përkëdhel sedrën, por nga ana tjetër të jep përgjegjësi.”
Ndërkohë, nga ana tjetër Kodheli ka refuzuar të bëjë publike tre emrat e propozuar nga ajo se kush mund të jenë kandidatë për President të Republikës, ndërsa zbuloi vetëm pjesën se propozimet e saj janë emra politik.
“Nuk më shkon në mendje. Madje mundohem ta largoj nga mendja këtë gjë. Besoj se duhet marrë me sportivitet, besoj se në këtë rast jam shumë me këmbë në tokë. Nuk kam ngazëllime as evidente që të jetë një gjë e tillë. Ai duhet të jetë një proces tranpsarent. emrat i kam zgjedhur brenda radhëve të politikës, pasi unë besoj se presidenti duhet të jetë njeri politik.”
