Prej 12 ditësh në portin e Vlorës mungon shërbimi i tragetit të linjës Vlorë-Brindizi për shkak të një defekti në motor.
Pavarësisht kontratës që detyron kompaninë të operojë me traget zëvendësues, nuk ka ende një zgjidhje. Aktualisht ne pritje ndodhen dhjetëra kamionë eksporti të kompanive të ndryshme që përballen prej ditësh më këtë ngërç në portin e Vlorës.
Sipas shefit te përpunimit, Festim Skëndaj, ne Portin e Vlorës, situata është problematike, dhe ajo vjen si pasojsë e monopolizimit të kësaj linje. Në Vlorë operon aktualisht vetëm një agjenci transporti detar.
Skëndaj: Është situatë jashtë normales. Kompania po bën të gjitha përpjekjet për të riparuar defektin. Tragetin tjetër e kishin futur në kantier të planifikuar për të përballuar sezonin e verës.
Aktualisht fatura financiare me te cilën përballet kompania kap shifrën e 2 mijë euro, ndërsa sipas njoftimeve paraprake trageti pritet t’i rikthehet itinerarit ditën e enjte. Por ndërkohë, transporti i udhëtareve, autobusëve dhe mallrave drejt shtetit fqinj mbetet i bllokuar.
