Policia e Shtetit bën bilancin e një jave: Kokainë e armë të sekuestruara, 151 të arrestuar

Policia e Shtetit bën bilancin e të arrestuarve gjatë operacioneve të një jave. Sipas uniformave blu, gjatë javës janë zhvilluar 28 operacione si dhe janë shpallur në kërkim 30 persona.
“Kokainë, kanabis, arsenal armësh, punishte për modifikimin e armëve, bimë narkotike, mallra kontrabandë dhe asete të paligjshme, të sekuestruara gjatë kësaj jave, nga strukturat e Policisë së Shtetit, në të gjithë vendin.
Si rezultat i angazhimit dhe profesionalizmit maksimal të strukturave të Policisë së Shtetit, në një javë, u finalizuan me sukses 2 megaoperacione policore:
-Operacioni “Silent”, i zhvilluar nga DVP Tiranë, gjatë të cilit është zbuluar një bazë ku prodhoheshin silenciatorë dhe modifikoheshin armët e zjarrit. Në këtë ambient u gjetën dhe u sekuestruan arsenal armësh të llojeve pistoletë e kallashnikov, silenciatorë, municion luftarak, pjesë të ndryshme armësh etj.
-Operacioni “Tranziti”, gjatë të cilit u sekuestruan 45.5 kg lëndë e dyshuar narkotike kokainë në një kontejner, në Portin e Durrësit, dhe u vunë në pranga 2 shtetas.
-Gjithashtu, nga Policia e Korçës është zbardhur vrasja e një 26-vjeçari dhe janë vënë në pranga 3 autorët e dyshuar të vrasjes.
•Gjatë kësaj jave janë arrestuar, proceduar dhe shpallur në kërkim 540 persona, nga këta: 151 janë arrestuar, 367 janë proceduar penalisht dhe 22 janë shpallur në kërkim.
•Janë kapur në total 30 persona në kërkim, nga të cilët: 28 në kërkim kombëtar dhe 2 në kërkim ndërkombëtar.
Janë zhvilluar 28 operacione policore të koduara: “Silent”, “Free road”, “Last package”, “Fati i lojërave”, “Portions”, “Processing”, “Username”, “Quantity”, “Motos”, “Eagle”, “Parandalimi”, “Cloned key”, “Kontaktuesit”, “Sharra”, “ECSTASY 22”, “Inside”, “MDMA”, “Road Guard 24”, “Road Guard 25”, “Fraud”, “Ngraçan”, “Kerraj”, “Luarzë”, “Border”, “Tranziti”, “Marjani”, “Game over” dhe “Hackers””-njofton policia.