Finalizohet me sukses operacioni policor i koduar “Diesel” nga specialistët e Hetimit të Krimit Ekonomik e Financiar të Elbasanit, për goditjen e veprimtarisë kriminale në fushën e kontrabandës me hidrokarbure.
Është arrestuar në flagrancë shtetasi Y.K., 53 vjeç, banues në fshatin Qukës, Përrenjas për veprat penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”, “Ruajtja ose depozitimi i mallrave kontrabandë” dhe “Fshehja e të ardhurave”.
Gjatë kontrollit të ushtruar në magazinën e bar-restorantit në pronësi të këtij shtetasi, janë gjetur dhe sekuestruar në cilësinë e provës materiale 1250 litra karburant, që dyshohen se janë futur kontrabandë, në vendin tonë.
Nga veprimet hetimore ka rezultuar se ky shtetas ka futur kontrabandë sasi hidrokarburesh në vendin tonë, të cilat i ka depozituar në ambientet e subjektit të tij dhe më pas i ka tregtuar duke fshehur të ardhurat.
Materialet i kaluan Prokurorisë pranë Gjykatës së Shkallës së Parë Elbasan, për veprime të mëtejshme.
