Një 26-vjeçar është arrestuar nga policia në Tiranë, pasi u kap në flagrancë duke transportuar mallra të dyshuara kontrabandë.
Sipas policisë, 26-vjeçari me inicialet R.K., banues në Korçë, u ndalua në aksin rrugor “Elbasan-Tiranë”, teksa lëvizte me furgon. Gjatë kontrollit u zbuluan 19 thasë me veshje të markave të ndryshme, të dyshuara si imitime dhe pa dokumentacionin shoqërues.
Sipas policisë, vlera e mallrave të sekuestruara arrin rreth shifrën 45 mijë euro.
Njoftimi i policisë:
Transportonte me furgon, veshje të ndryshme, të dyshuara të kontrabanduara, me vlerë rreth 45 000 euro, kapet në flagrancë në aksin rrugor “Elbasan-Tiranë” dhe arrestohet 26-vjeçari.
Sekuestrohen veshjet dhe furgoni. Specialistët e Seksionit për Hetimin e Krimit Ekonomik dhe Financiar të DVP Tiranë, në vijim të punës për parandalimin, evidentimin dhe goditjen e veprimtarisë kriminale në fushën e kontrabandës së mallrave, bazuar dhe në informacionet e siguruara në rrugë operative, organizuan dhe finalizuan operacionin policor të koduar “Wrong way”.
Si rezultat i këtij operacioni u arrestua shtetasi R. K., 26 vjeç, banues në Korçë.
Ky shtetas është kapur në flagrancë nga shërbimet e Policisë, në aksin rrugor “Elbasan-Tiranë”, duke transportuar me furgon, 19 paketime (thasë) me veshje të imitimeve të markave të ndryshme, pa dokumentacion shoqërues.
Vijojnë hetimet për dokumentimin e kësaj veprimtarie të kundërligjshme dhe identifikimin e shtetasve të tjerë që mund të jenë të përfshirë.
Materialet procedurale iu referuan Prokurorisë së Tiranës, për veprime të mëtejshme.
