Ish-sekretari i Përgjithshëm i FRPD, Grigels Muçollari e quan truk hileqar, platformën për bashkimin e PD-së të Enkelejd Alibeajt,. Në një intervistë për mediat, Muçollari tha se ka shmangur grupin parlamentar duke nxituar të shpallë një deklaratë që i shërben palëve të treta. Sipas tij, pas deklaratës së Alibeajt qëndron Lulzim Basha i cili sipas tij ka për qëllim përçarjen e demokratëve.
“Që në momentin që e quan platformë parimesh, vetë platforma nuk ka parime, parimi kryesor është parimi i votës, përtej kësaj, dalim te ajo që thotë ‘me përgjegjësi të lartë ndaj PD’. Unë nuk e di ku e sheh përgjegjësinë e lartë Alibeaj ndërkohë që i ka pasur të gjitha etapat e mundshme, të jetë përgjegjës për veprimet që ka bërë, për mbështetjen që i ka dhënë Bashës, për mënyrën si e çoi PD-në, logon e PD, forcë të tretë, madje po të kishte një të katërt, do e çonte të katërtën në zgjedhjet elektorale. Në këtë aspekt, vetëm përgjegjësi ndaj PD nuk ka. Sa i takon mënyrës si është ndërtuar kjo deklaratë, sipas informacioneve të mia në diskutime me disa deputetë nuk ka pasur asnjë mbledhje grupi që të diskutohet për një deklaratë kaq të rëndësishme. Pse ka frikë Alibeaj të mbledhë deputetët dhe t’i dëgjojë? Deputetët kanë pranuar se në thelb teksti nuk ka asgjë të keqe për të mos u pranuar, por deputetët kanë kërkuar të kthehen te gjeneza e problemit, përjashtimi i zotit Berisha nga grupi parlamentar pa kaluar në një institucion votimi. Dhe kjo nuk është përfshirë në deklaratë, është marrë thjeshtë në telefon, iu është thënë një përqasje e kësaj deklarate në mënyrë tinëzare, duhet ta theksojmë, si një truk hileqar për të mbajtur gjallë frymën e përçarjes për dëmtimin e PD. Si deklaratë del jashtë kontekstit statutor” – shprehet Muçollari.
