Pas plagosjes së biznesmenit ditën e sotme në Tiranë, është paraqitur vetë në komisariat biznesmeni Albert Allmuça.Raportohet se Allmuça pretendon se nuk është i përfshirë në këtë ngjarje.
Sino Llanaj dhe Albert Allmuça u konfliktuan mëngjesin e sotëm dhe sherri agravoi deri në përdorimin e armëve ku u plagos Llanaj.
Burime bëjnë me dije se në konflikt janë të përfshirë të paktën pesë persona, raporton abcnews.al. Mësohet se Sino Llanaj ka shkuar tek pallati me persona të tjerë. Sipas policisë kanë qenë të organizuar për të shkuar aty.
Grupi hetimor vijon hetimet, ndërkohë që ende nuk dihet kush ka qëlluar me armë. Nga të shtënat mbeti i plagosur biznesmeni Llanaj si dhe një kalimtar i rastit. Po ashtu gjatë përleshjes është lënduar edhe roja i pallatit në ndërtim pasi është goditur me grushte dhe sende të forta.
Ngjarja ka ndodhur në rrugën “Ndre Mjeda”, ku gjithçka ka nisur pas një sherri mes ortakësh të kompanisë “Star Construction”. Konflikti mes dy ortakëve të ndërtimit të një pallati Sino Llanaj dhe Albert Allmuça është i hershëm. Ata kanë akuzuar njëri-tjetrin për mos kryerje pagesash të përbashkëta. Mosmarrëveshjet mes dy pronarëve kanë bërë që afati i përfundimit të pallatit të shtyhet, e për pasojë banorët që kanë blerë hyrje kanë protestuar të shtunën.
