Kreu i FSHZH, Dritan Agolli, sfidon SPAK-un, duke zhvilluar një tender në shkelje të ligjit, ndërkohë që është nën hetim për projektin e “100 fshatrave”, për të cilin akuzohet për korrupsion.
Tashmë Agolli po manipulon projektin e madh me shumë faza që ka objekt blerje materialesh për bashkitë. Po flasim këtu për prokurimin ”Mbështetje për realizimin e projekteve bashkiake, infrastrukturore, nëpërmjet formave të kontributit të përbashkët – materiale elektrike”. Ky është i ndarë në disa faza dhe secila prej tyre ka të paktën nga 2 lote.
Denoncimi
Disa prej loteve janë aprovuar dhe lekët janë ndarë. Ndërsa tek faza e radhës çështja ka ngecur për shkak se tenderi është denoncuar në KPP.
Pra është ankimuar prokurimi me objekt “Mbështetje për realizimin e projekteve bashkiake, infrastrukturore, nëpërmjet formave të kontributit të përbashkët – materiale elektrike, Loti 2 (Faza III).” Për këtë tender janë vënë në dispozicion 2.5 milionë euro dhe sipas preventivit parashikohet të blihen kabuj dhe shtylla elektrike. Tenderi ishte parashikuar të mbahej më datë 21 tetor 2024 dhe fondet kanë parashikuar të merren edhe nga buxhetet e 2 viteve të ardhshme.
Por procedurat janë pezulluar.
Në datën 8 nëntor 2024 pranë Komisionit të Prokurimit Publik, është administruar ankesa e operatorit ekonomik “ITE GROUP” SHPK. Nga shqyrtimi paraprak i ankesës së sipërcituar, u konstatua se objekti i ankesës lidhet me vendimmarrjen e Komisionit të Vlerësimit të Ofertave mbi kualifikimin e ofertës të paraqitur nga operatori ekonomik “BAULED” SHPK në procedurën e mësipërme të prokurimit.
Ankimuesi shprehet se FSHZH ka kualifikuar ofertën firmës BAULED SHPK, edhe pse ajo ishe “anomalisht e ulët”, pra nuk përmbush kriteret. Ndërkohë janë skualifikuar padrejtësisht ofertat e tjera.
“Nga shqyrtimi i ofertës ekonomike të operatorit ekonomik BAULED SHPK, në zbatim të dispozitave ligjore të sipërcituara, rezulton ofertë anomalisht e ulët dhe për ta justifikuar atë Operatori Ekonomik BAULED SHPK duhet të plotësojë, në mënyrë kumultative kushtet e parashikuara në shkronjat a), b), c) dhe ç) të pikës 2 të nenit 93 të LPP. Barra e provës mbi argumentin e ofertës anomalisht të ulët i përket operatorit ekonomik, oferta e të cilit është konstatuar nga Komisioni i Vlerësimit të Ofertave si anomalisht e ulët. Operatori Ekonomik BAULED shpk, nuk e ka justifikuar ofertën anomalisht të ulët në bazë të ligjit”, thuhet në ankesë.
Më tej theksohet se nuk janë dhënë argumente për skualifkimin që në fazën e parë të kompanisë “BAULED” SHPK.
Shpresojmë që komisioni i KPP të shqyrtoje me kujdes ankesën dhe procedurat e zhvillimit të garës, si dhe kriteret e tenderit. Pasi theksuam që në fillim se janë disa lote për këtë projekt të madh ku blihen materiale të ndryshme për bashkitë, po pa specifikuar se në cilat bashki do të shkojnë materialet dhe sa nevojiten për secilin institucion.
Kujtojmë që pak ditë më parë, gijotina.com denoncoi 4 tenderë të tjerë të këtij projekti, të cilët mbanin vlerën 5.4 milionë euro për blerjen e tubave dhe betonit. Të katër prokurimet mbajnë “Flamurin e kuq” nga Open Data Albania, që sinjalizon abuzimin e bërë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
