Përplasja e kryeministrit Edi Rama dhe kryetarit të Bashkisë Vlorë, Dritan Leli po reflektohet në cdo nismë që bashkia merr. Së fundmi, ka pasur kontestime lidhur me miratimin e buxhetit vjetor nga ana e prefektit të qarkut, Flamur Mamaj.
Ditën e sotme, këshilltarët bashkiak miratuan sërish projektbuxhetin e hartuar, i cili ishte kthyer pas rreth dy javë më parë nga prefekti Mamaj. Ky i fundit kishte dërguar në relacion vërejtjet për këtë projektbuxhet.
Ai nënvizon se caktimi i tarifave për pastrim, ndriçim dhe gjelbërim për bizneset me të ardhura deri të 8 milionë lekë është në kundërshtim me paketën fiskale. Së dyti, ai konstaton se pjesa e buxhetit për pastrimin e qytetit është më e vogël se viti i kaluar edhe pse është rritur taksa e pastrimit.
Së treti, Mamaj thekson se nuk është garantuar përmbushja e detyrimit ligjor për mirëmbajtjen e tokës bujqësore, ndërsa shton se nuk janë llogaritur detyrimet ndaj kreditorëve dhe furnitorëve.
Kjo përplasje vjen pas mosmarrëveshjeve mes kryeministrit Edi Rama dhe Dritan Lelit, kur ky i fundit refuzoi të kandidonte si deputet në listat e 25 prillit.
