Zëdhënësja e qeverisë Elisa Spiropali dhe deputetja Rudina Hajdari kanë replikuar me tone të ashpra në Kuvend për kodin zgjedhor, lidhur me këtë ka reaguar kreu i Lëvizjes Vetëvendosje në Tiranë Boiken Abazi.
Përmes një statusi në Facebook, Abazi shkruan se “Një deputete si Hajdari, që pretendon të nisë një alternativë të re, voton më 30 korrik për ndryshime kushtetuese që pengojnë alternativat e reja. Tani “zihet” me Spiropalin në Kuvend? Hajdari, me votën e saj në 30 korrik ia ka mundësuar partisë së Spiropalit ta ndryshojë kodin zgjedhor drejt autoritarizmit elektoral”.
Postimi i plotë
Në fakt përplasja mes Elisa Spiropalit dhe Rudina Hajdarit për kodin zgjedhor nuk ka kuptim. Rudina Hajdari i votoi më 30 korrik ndryshimet kushtetuese që i hapën rrugën ndryshimeve të kodit zgjedhor që po çon sot përpara PS, duke vendosur pragun e dyfishtë (lokal dhe kombëtar) që deformon edhe më shumë votën qytetare, duke penguar alternativat e reja. Pra, një deputete si Hajdari, që pretendon të nisë një alternativë të re, voton më 30 korrik për ndryshime kushtetuese që pengojnë alternativat e reja. Tani “zihet” me Spiropalin në Kuvend? Hajdari, me votën e saj në 30 korrik ia ka mundësuar partisë së Spiropalit ta ndryshojë kodin zgjedhor drejt autoritarizmit elektoral. Ndërsa Endri Shabanin, që përplasej dje në debat me Elisa Spiropalin, nuk e kam parë të mbajë qëndrim lidhur me votën e bashkëpartiakes së tij, Rudina Hajdari, në 30 korrik. Para se të përplaset me Spiropalin, Shabani ka detyrimin publik të mbajë qëndrim për bashkëpartiaken e tij, Hajdarin, vota e së cilës ia shtroi rrugën ndryshimeve të dëmshme të kodit zgjedhor nga PS.
#kundërspektaklitnëpolitikë
