Në një kohë kur Gjykata Kushtetuese ka marrë në shqyrtim një padi për zhvlerësimin e përgjimeve të aplikacioneve të koduara SKY/ECC, kryetari i Partisë Demokratike, Sali Berisha, denoncon se mbi këtë trupë gjykuese po bëhet presion i jashtëzakonshëm.
Sipas tij, janë gati 1 milion faqe përgjime dhe biseda që zbërthejnë 95 për qind të trafiqeve dhe krimeve të tjera të ndodhura në vitet e fundit, ku thotë se përfshihen edhe emra politikanësh.
“Me gjyqtarët brenda Gjykatës Kushtetuese po ndodhin të gjitha format antikushtetuese të presionit ndaj tyre dhe gjithçka synohet të delegjitimojë dokumente legjitime zyrtare. Prapa kësaj përpjekjeje të jashtëzakonshme qëndron pjesëmarrja direkte në krime e qeveritarëve nga Edi Rama, Taulant Balla, Agaç e kompani”, tha Berisha në një deklaratë për mediat këtë të premte.
Lideri i opozitës, nga arresti shtëpiak, komentoi edhe ngjarjen e të enjtes në Kuvend, ku deputetët e opozitës u përplasën me Gardën dhe forcat e Policisë së Shtetit. Berisha e konsideron si akt puçist hyrjen e forcave të rendit në Kuvend dhe akuzon ministrin e Brendshëm dhe kryetaren e Kuvendit si përgjegjës.
“Këta nuk kanë as ligj dhe as Kushtetutë, se ato ishin akte puçiste. Nuk mund të fusësh në territorin e parlamentit, pa vendim të parlamentit, forca të tjera përveç Gardës së Republikës. Duhet të shpallësh gjendje të jashtëzakonshme që të angazhosh forca të tjera në parlament”, u shpreh Berisha.
Teksa u bëri thirrje qytetarëve që t’i bashkohen Partisë Demokratike në mosbindje civile, Berisha pohoi se deputetët e opozitës, në takimet që do të kenë në selitë e institucioneve ndërkombëtare, do të kërkojnë edhe ngritjen e të ashtuquajturit Komision i së Vërtetës.
“Do të jetë një nga kërkesat që do të paraqesim në Bruksel, në Strasburg, në Kongresin e SHBA-së dhe në Senatin e këtij vendi. Në të gjitha parlamentet e Evropës”, tha kreu i PD.
Sa i përket pranisë në seancat gjyqësore gjatë procesit për çështjen “Partizani”, Berisha pohoi se ende nuk kishte marrë një vendim nëse do të merrte pjesë apo jo.
