Pak para nisjes së seancës së Kuvendit, ka përfunduar Konferenca e Kryetarëve ku është diskutuar mbi propozimet e partive për Komisionin e Vetingut.
Konkretisht, emrat e propozuar nga PS për komisionin e Vettingut janë Vasilika Hysi dhe Ulsi Manja, (pritet të propozohet dhe një tjetër emër nga PS) ndërsa nga LSI është Luan Rama si dhe nga PDIU, Shpëtim Idrizi. Ndërkohë, opozita nuk ka sjellë asnjë propozim të sajin.
Në seancë plenare do të diskutohet për ngritjen e komisionit ad hoc që do të verifikojë kandidatët e institucioneve të rivlerësimit të gjyqtarëve dhe prokurorëve shqiptarë.
Rendi i ditës i seancës parashikon votimin e dy pr/vendimeve: “Për procedurat parlamentare për funksionimin e komisioneve ad hoc dhe realizimin e procesit të votimit sipas ligjit “Për rivlerësimin kalimtar të gjyqtarëve dhe prokurorëve” dhe të pr/vendimit “Për krijimin dhe përbërjen e komisionit ad hoc për verifikimin e kandidatëve për institucionet e rivlerësimit”.
