Presidenti i Sirisë, Bashar al-Asad, thotë se marrëveshja e armëpushimit e arritur në Mynih, mund të mos zbatohet.
Kjo, sipas tij, kryengritësit, të cilët ai i quan terroristë, mund të mos kenë vullnetin për ta respektuar këtë marrëveshje.
“Vështirë se këta njerëz do t’i ulin armët.
Dëgjuam që kërkuan vendosjen e një armëpushimi brenda javës. Dakord, po kush është ai që do të arrijë t`i përmbushë të gjithë kushtet në një javë?
Asnjëri nuk mundet. Kush do flasë me terroristët nëse një organizatë terrori refuzon ta respektojë pushimzjarrin, kush do t`i detyrojë të japin llogari”, tha ai.
Deklaratat e tij vijnë një ditë pasi forcat e ushtrisë së Sadait, të mbeshtetura nga Rusia, bombarduan dy spitale.
Këshilltarja amerikane për Sigurinë Kombëtare, Susan Rice i tha gazetarëve se përshkallezimi i fushatës ushtarake hedh hije të mëdha dyshimi mbi vullnetin e Moskës për zbatimin e asaj çfarë u arrit në Mynih.
Por Asad kërkon t’ua hedhë fajin rebelëve.
Për këtë arsye, duket se marrëveshja e armëpushimit mund të jetë e vështirë për t’u zbatuar.
Aq më tepër që Moska ka paralajmëruar se nuk do të ndalë bombardimet ndaj atyre që i konsideron si terroristë.
