Kanë përfunduar hetimet ndaj vëllezërve Seit Manahasa dhe Kreshnik Manahasa. Dosja e dy të akuzuarve për disa vepra të rëndë penale ka kaluar për gjykim nga prokuroria e Elbasanit.
Burime bëjnë me dije se akuzohen për heqje të paligjshme në bashkëpunim të lirisë, vjedhje me dhunë në bashkëpunim, ngacmim seksual dhe shtrëngim me dhunë për dhënie pasurie (Gjobvenie). Gjithashtu Prokuroria Elbasan ka kaluar për gjykim Kreshnik Manahasën për falsifikim dokumentesh.
Seit Manahasa është një emër i njohur për policinë në zonën e Elbasanit. Ai është arrestuar më parë për vrasjen e Emiljano Ramazanit, por që më pas u la i lirë. Policia jep detaje se Manahasa dhe bashkëpunëtori i tij K. M., 37 vjeç, kanë mbajtur peng duke i kërcënuar dhe keqtrajtuar për disa orë personat G. M. dhe F. D. Dy autorët e kësaj ngjarjeje, nëpërmjet dhunës iu kanë marrë 12.000 lekë, ndërsa i kanë shantazhuar me qëllim për t’iu dhënë një shumë prej 20.000 eurosh. Pas lirimit, dy personat e rënë pre e dhunës dhe shantazhit kanë shkuar dhe kanë bërë denoncimin në Policinë e Elbasanit, e cila u vu në veprim së bashku me forcat RENEA dhe e arrestoi dje në Peqin, Manahasën dhe shpalli në kërkim bashkëpunëtorin e tij 37-vjeçar K. M. “Specialistët për Hetimin e Krimit Kundër Personit në Drejtorinë Vendore të Policisë Elbasan, pas denoncimit të marrë nga shtetasi G. M. dhe shtetasja F. D. se në hyrje të qytetit të Peqinit, pranë një poligoni inertesh. U arrestua shtetasi: Seit Manahasa, 38 vjeç, banues në Peqin. Si dhe u shpall në kërkim policor dhe po punohet për kapjen e shtetasit K. M., 37 vjeç, banues në Peqin. Arrestimi i shtetasit S. M. dhe shpallja në kërkim e bashkautorit tjetër, shtetasit K. M., u bë pasi në bashkëpunim me njëri-tjetrin iu kanë hequr lirinë për disa orë shtetasit G. M. dhe shtetases F. D., dhe nëpërmjet dhunës iu kanë marrë 12.000 lekë. Njëkohësisht i kanë kërcënuar dhe shantazhuar me qëllim për t’iu dhënë një shumë prej 20.000 eurosh”, thuhet në njoftimin për shtyp nga policia.
Tre akuza ndaj tyre
Për ngjarjen në fjalë ndaj të arrestuarit Seit Manahasa dhe bashkëpunëtorit të tij me iniciale K. M., i cili vazhdon të jetë në kërkim, rëndojnë 3 akuza “Shtrëngimi me anë të kanosjes për dhënie pasurie”, “Vjedhja me dhunë” dhe “Heqja e paligjshme e lirisë” kryer në bashkëpunim. Arrestimi i Manahasës, i cili është person jo pak i njohur për Policinë e Shtetit, është bërë në kuadër të operacionit “Poligoni”, nën aksionin e forcave speciale RENEA. Theksojmë sërish se Manahasa akuzohet për vrasjen e Emiljano Ramazanit më 20 korrik të 2020. Në atë kohë ai u arrestua së bashku me të atin për vrasjen e Ramazanit dhe më pas u lanë të lirë nga Gjykata e Elbasanit, e cila pushoi çështjen për ta në dhjetor të 2020. Gjatë kontrollit në biznesin e tyre iu gjet arma e krimit të përdorur për vrasjen e të riut, një pistoletë model 54 TT, me një krehër dhe një fishek luftarak, e fshehur poshtë sabratorit të një makine. Emiljano Ramazani i njohur me nofkën “Rramani” u vra poshtë shtëpisë së tij, teksa ai po parkonte automjetin tip “Ford Fokus”. Autorët kanë qenë tre vetë në makinë dhe njëri prej tyre ka qëlluar 5 herë me armë tip pistoletë. Vrasja dyshohet se ka ndodhur për larje hesapesh për drogën, pasi ai njihej si shpërndarës kokainë në qytet, ndërsa pak ditë pas vrasjes së tij u gjet i vrarë edhe miku i tij i ngushtë Regis Runaj, 23 vjeç, i vrarë me thikë, trupi të cilit u gjet i hedhur në rrugë.
