PD ka reaguar lidhur me raportin e publikuar pak ditë më parë nga “Together for Life”, sipas të cilit ka mungesë transparence me prokurimet dhe tenderët për pandeminë e Covid-19 në vendin tonë.
Koordinatori kombëtar i PD për shëndetësinë, Gazment Koduzi tha se raporti konfirmoi akuzat e PD, për miliona euro tendera sekretë e prokurime korruptive për përballimin e COVID-19.
“Abuzimi me tenderët e shëndetësisë paraqitet edhe në raportin e Transparency International ku theksohet se qeveria ka përdorur pandeminë e Covid-it si pretekst për të mos dhënë informacion për shpenzimet publike e po kështu edhe FMN-në thotë se prokurimet emergjente për përballimin e pandemisë nuk ishin transparente. Korrupsioni dhe abuzimi me tenderët ka qenë një shqetësim i vazhdueshëm për institucionet ndërkombëtare. Gjykata Europiane e Auditit ka theksuar se në Shqipëri 30% e tenderëve publikë janë të paracaktuara”, tha Koduzi.
Ndër të tjera, Koduzi i bën thirrje SPAK të hetojë tenderat korruptive të qeverisë, ndërsa akuzoi Ramën se përdori pandeminë për të vjedhur shqiptarët.
