Partia Demokratike ka publikuar të dhënat e sistemit TIMS që tregojnë se Arben Ahmetaj dhe Damian Gjiknuri kanë udhëtuar disa herë jashtë vendit me pronarët e inceneratorëve, Mirel Mërtirin dhe Klodian Zoton, ndonëse e mohuan në Komisionin hetimor.
Deputetja e PD, Oriola Pampuri, shprehet se udhëtimet jashtë vendit të pronarëve të inceneratorëve me ish-ministrat e qeverisë, vërtetohen përmes sistemit TIMS.
“Mirel Mertiri, Klodian Zoto dhe Stela Gugallja nuk ishin të panjohur për qeveritarët dhe ardhja e tyre nuk ishte rastësi. Mjafton të shikoni historinë e udhëtimeve të Ahmetajt dhe Gjiknurit për të kuptuar se ata njiheshin, udhëtonin bashkë me letra që prej 2012, por të dhënat flasin për një njohje më të hershme mes tyre. Gjithçka për aferën e inceneratorëve ka qenë e planifikuar. Nga 27 janari 2012 deri më 16 tetor 2019, Arben Ahmetaj ka udhëtuar 12 herë me dy pronarët e kompanive të inceneratorëve Mirel Mërtiri dhe Klodian Zoto. Nga 27 janari 2012 deri më 23 korrik 2019, Damian Gjinkuri ka udhëtuar 6 herë me dy pronarët e kompanive të inceneratorëve Mirel Mërtiri dhe Klodian Zoto”, deklaron Pampuri.
Sakaq, deputetja e selisë blu deklaron se Mirel Mërtiri dhe Klodian Zoto, janë në kërkim ndërkombëtar për korrupsion ndërsa shton se miqtë e tyre politikanë, duke iu referuar Arben Ahmetajt dhe Damian Gjiknurit vazhdojnë vjedhjet të pashqetësuar. Më tej PD inkurajon SPAK të ndalojë vazhdimin e vjedhjes dhe të vendosë përpara drejtësisë përgjegjësit.
